Domain Name System

Der Artikl is im Dialekt Obaboarisch gschriem worn.

S' Domain Name System (DNS) is as Adressbiachal in am IP-basiadn Netzwerk und damit a im Internet. Domit werd fia an Nama, z. B. bar.wikipedia.org a IP-Adress gfundn, in dem Foi 91.198.174.232. S' is auf vui DNS-Serva vateilt, wovo koana olle Adressn kenna duad, aba jeda Serva mindestens oan andan Serva kinnt, den a Frong ko, wenn a sejba koa Antwort ned woas.

Fia a Vabindung in am IP-basiadn Netzwerk bracht ma ned unbedingt as DNS. Aba wenn ma mit Nama und ned mit de Nummern arban mecht is zwingend notwendig. Desweng is de IP-Adress vo am DNS-Serva oane vo de Grundeinstellunga vo am Rechner, dea zua am IP-basiadn Netzwerk gheart. De gheart mit am Standard-Gateway, da eigna IP-Adress und da Subnetzmaskn zua de Grunddaten, de am Rechner vo am DHCP-Serva zuagwiesn wern. Iablichaweis gibt ma zmindest zwoa DNS-Serva o.